Nhar it-Tlieta, 11 ta’ Awwissu, il-Parroċċa tagħna bdiet l-aħħar jiem ta’ preparazzjoni bi tħejjija għal festa solenni ad unur tal-Omm tagħna tas-sema Santa Marija. Din is-sena l-predikazzjoni tat-Tridu saret mill-Wisq Reverendu Provinċjal tal-Agostinjani Patri Luċjan Borg OSA. Din is-sena, il-quddisiet tat-Tridu ġew iċċelebrati mis-saċerdoti li qegħdin jiċċelebraw l-anniversarju mill-ordinazzjoni saċerdotali tagħhom, fosthom Dun Ġwann Muskat (Kappillan tal-Kor) li qed jiċċelebra l-25 anniversarju tiegħu. Mons. Rużar Borg li qed jiċċelebra l-50 anniversarju, u Mons Dekan Anton Gauci li qed jiċċelebra s-60 anniversarju mill-ordinazzjoni saċerdotali tiegħu. Aħna minn qalbna nirringrazzjawhom tal-ħidma tagħhom b’risq il-Knisja Katidrali.

Nhar il-Ħadd, 9 ta’ Awwissu, il-komunità parrokkjali ċċelebrat jum iż-żgħażagħ u l-isportivi. Fl-10:30am ġiet ċċelebrata quddiesa minn Patri Marcello Ghirlando OFM bis-sehem tad-diversi għaqdiet taż-żgħażagħ fi ħdan il-komunità parrokkjali u s-Soċjetà Leone. Fi tmiem il-quddiesa Mons Arċipriet qasam it-tazzi lill-aħjar players tal-SK Victoria Wanderers.