Illum il-Knisja Kattolika ċċelebrat it-tifkira solenni tal-mejtin kollha. F’dan il-jum niftakru f’ħutna l-egħżież li marru jiltaqgħu mal-Ħallieq fis-Sema. It-tifkira ta’ dan il-jum għandha tifsira partikulari għaliex illum filwaqt li qegħdin infakkru lil mejtin imma fl-istess ħin qegħdin infakkru l-glorja ta’ Kristu fuq il-mewt għal ħajja.

Bil-magħmudija, lkoll sirna ċittadini tas-sema, familjari tad-dar t’Alla. Dan ifisser li aħna lkoll qaddisin. Fil-ħajja ta’ kuljum mistednin ngħixu din il-qdusija li fi kliem Santa Tereża tal-Bambin Ġesu’ tfisser “tagħmel il-ħwejjeġ ordinarji ta’ kuljum b’mod straordinarju”.

Nhar il-Ġimgħa filgħaxija għal ħabta tas-5:45pm waslet fostna r-Relikwja tad-Driegħ tal-Appostlu Missierna San Pawl. Matul dan l-aħħar ħmistax din ir-relikwja żaret il-parroċċi kollha tad-Djoċesi u l-aħħar żjara ta’ din ir-relikwja kellha tkun propju fil-Knisja Katidrali, fejn damet għal jumejn.

Illum il-Ħadd 19 ta’ Ottubru, fil-Knisja Katidrali saret il-ġurament u l-pussess tal-Monsinjur Salv Tabone. Dun Salv Tabone qabel ma’ huwa laħaq monsinjur fi ħdan il-kapitlu, serva bħala kappillan tal-kor għal madwar 30 sena, u serva wkoll bħala Ċerimonier Djoċesan tal-Isqof Emeritus Nikol Ġużeppi Cauchi kif ukoll tal-Isqof attwali l-Eċċellenża Tiegħu Mons. Mario Grech.